Die Uitspanning bied aan gaste die geleentheid om ‘n deel van die Afrikaner se kultuur-historiese erfenis aan die lyf te ervaar! Slaap in ‘n gerestoureerde antieke ossewa in die Karooveld vlakby die Afrikanerdorp Orania en oordink wat die woorde “oor ons ver verlate vlaktes, met die kreun van ossewa” nou éíntlik sou beteken...

Adam se Uitspanning bestaan uit nege gerestoureerde ossewaens wat omskep is in unieke selfsorg-akkommodasie. Die “Blomwaens” is beide waens in die klassieke kakebeen-nagmaalwavorm. Coos se ddisselblom en Adelaide se nagmaalwa is saam met die Dopper Joris die trio van blommewaens, met 'n meer romantiese en verfynde karakter. Die waens is bottelgroen, met vrolike geel disselblomme (of perdeblomme, as jy wil!) of pienk Baurnmalerei-tipe blomme versier. Hierdie waens spog ook met 'n gietystertafeltjie en -stoele en ‘n riempiesbank wat by die blomtema pas. Daar is gemaklike opvoukampstoele, wat onder die wa of langs die kuiervuur opgeslaan kan word. Die kombuiskas is gemaak van herwinde hout. Daarin is eetgerei, kookgereedskap, vatlappies, resepteboeke en meeste apparaat wat in 'n ossewa se mobiele kombuis tuis hoort. Die gietyster driepootpot, klein swart potjie, pan en broodpan behoort die voorbereiding van die maaltyd volledig te maak saam met die resultate van die rooster op die braaivleisvuur. 'n Koekblik met koekies en beskuit en 'n houertjie melk word voorsien om saam met 'n beker boeretroos of tee te geniet. Koffiebone moet self vars gemaal word, en vir kookwater word 'n gasstofie voorsien. ‘n Bondel hout word verskaf vir die kuier om die Karoovuurtjie. Hierdie staning is ideaal vir groot familiekuiers, re-unies van ou vriende of vierings van spesiale verjaarsdae. ‘n Onlangse toevoeging is ‘n lekker groot vuurmaakput en ‘n latjie-skerm vir privaatheid en om die wind so bietjie af te keer. Vir die kinders kan daar kooi gemaak word op die stoep, of onder die wa – soos daar vanslewe gedoen is! Gesonde ekologiese praktyke word nagekom deur herbenutting van gryswater, sonkrag en 'n klein gasgeiser vir warm stortwater. Adelaide se nagmaalwa en Coos se ddisselblomwa deel 'n badkamer. NS. Bring jou sweep en kettie, laaibank vir jou selfoon, ‘n flits as jy meer wil sien as wat sigbaar is in die kerslig wat verskaf word, en muskietdoepa!

Die Middelveld (Bo-Karoo) lê vol ossewaspore van jagters, veeboere, trekkers en transportryers. Dit is ‘n dorre wêreld met snikhete somers, ysige winters, woeste westewinde, stof, vlieë en muggies. Maar dit is ook ‘n wêreld wat maklik jou hart kan inkruip met sy stiltes, goue sonsondergange, vergesigte met skurwe randjies en tafelkoppies, ysterklip en karoobossies. Die Uitspanning is ‘n plek waar die natuurliefhebber met ‘n Boerehart kan kom ontspan en die natuur beleef. Die waens dateer uit die 1920’s en is meesterlik herstel tot hul eertydse glorie deur die vakmanskap van prof Erik Holm en sy span. Al die waens se geskiedenis en wabouers se styl is deeglik nagevors en gedokumenteer. Elke wa het ‘n eiesoortige karakter, sodat elke staning ‘n unieke ervaring sal bied.